Pilar Rubio, Óscar Jaenada, Miguel Ortiz, Silvia Abascal, Luis Zahera, Luisa Merelas . Son algún dos actores que participan na rodaxe de Piratas, a serie para televisión dirixida polo lucense Jorge Coira. A aposta de Telecinco ambientada no século XVIII comezou a gravarse o pasado 23 de agosto e conta con numerosas localizacións en diferentes puntos da xeografía galega (de Tui a Santiago, pasando polo castelo de Soutomaior; os pazos de Fefiñás, Cascaxide, Trasfontao e Rubiáns; os mosteiros de San Lorenzo de Carboeiro e San Xoán de Poio e o convento das Madres Agustinas Recoletas). A serie, que se estreará nos vindeiros meses conta as historias dun descarado noble, Álvaro Mondego (Óscar Jaenada) que ten numerosas débedas económicas e de honor ás súas costas que é capturado pola tripulación do pirata Bocanegra e a súa filla Carme (Pilar Rubio). Iníciase así, unha pugna por atopar un lendario tesouro.
Dunha serie de emisión estatal a outra, Gran Reserva. Non está rodada en Galicia nin conta con numerosos actores galegos, pero a produtora (Bambú Producciones) desta serie ten ADN galego. Ramón Campos (Noia, 1975) cofundou esta empresa, logo dunha intensa experiencia con Filmanova, Continental e Voz Audiovisual. Esta serie contratada e emitida por Televisión Española, chegou a bater marcas de audiencia na súa primeira temporada. Acaban de rematar a rodaxe da segunda entrega que se empezará a emitir en breve e contará con 13 capítulos e novas personaxes.
Películas para cine e para televisión
Na carteira das grandes produtoras hai proxectos para todos os gustos. En Continental están a traballar nunha miniserie de carácter histórico coa súa produtora catalana Dream. En paralelo están en plena gravación dun docusoap para Televisión de Galicia, con formato de 50 minutos e para emitir en primer time sobre vilas e lugares. Tamén para televisión, en marzo comezará a rodaxe de O que choveu, unha película para televisión que Continental coproduce xunto coa produtora andaluza Arrayás Producciones. Cunha achega de Agadic para a produción, contan o conflito entre dúas familias no contexto da posguerra. Paula Cons, directora de contidos de Continental explicaba no momento da resolución daquela liña de axudas a Culturagalega.org, que pretendemos abordar os conflitos de dous núcleos familiares de orixe diferente: unha é unha familia andaluza e a outra é unha familia de emigrantes galegos que se trasladan a Andalucía. Un feito que nos da pé a falar do fenómeno da emigración galega a Andalucía, da política porque un dos membros da familia galega era un represaliado que traballou nos estaleiros en Ferrol. Na cola de proxectos de Continental tamén está a segunda parte de A tropa de Trapo, e para xaneiro estará finalizado o biopic para televisión Barreiros, el Henry Ford español, que conta o ascenso e declive do galego que inventou un motor diesel e chegou a asociarse coa Chrysler.
Nos vindeiros meses comezará a rodaxe de Little Galicia, a película que pon en marcha Alber Ponte (dirixe, guioniza e produce), para a contar a fin de semana de dous galegos en Nova York, no que vivirán unha serie de circunstancias que farán que as súas vidas non volvan ser as mesmas. Malia que produce o propio Alber Ponte (coa súa produtora Sierra Madre), contará co apoio da produtora de Pedro Masó, con intervención de diversos organismos e televisións públicas. As localizacións da rodaxe desta produción sucédense entre Ponte Ulla, Lalín e Nova Yersey, e conta no reparto con Alberto San Juan, Fran Grela, Mabel Rivera, José Ángel Egido, Camila Bossa, Sancho Gracia, Celia Guerrero, Mela Casal, Sergio Pazose unha breve participación de Luis Tosar.
A directora e académica Margarita Ledo está en plena rodaxe de A cicatriz branca, a súa terceira longametraxe. Nesta ocasión achegarase á emigración das mulleres galegas centrándose en dous momentos: nos anos vinte e no final da década dos anos corenta e inicios dos cincuenta. A bailarina Cloti Iglesias, a poeta Eva Veiga e a artista plástica Renta Otero son as actrices coas que Ledo conta esta historia ficcionada pero cun importante peso documental, na que tamén participan Tamar Novas, Lino Braxe e Xavier Deive. Este filme pecha a triloxía iniciada pola autora en 2004 con Santa Liberdade e toma como base a obra Porta Blindada do intelectual Antón Moreda. De feito, o filme comezou a rodarse no manicomio do Castro, no que Moreda ingresou en 1966.
Estes días tamén saía a nova de que Dygra films, que está a ultimar a súa última longametraxe Noite de Paz?, que ten prevista a súa estrea para o Nadal de 2011. A produtora coruñesa quere captar novos talentos e acaba de convocar un concurso a través das redes sociais para que os creadores participen no filme creando, de xeito animado, os créditos desta produción. De animación tamén vai a secuela de O Apóstolo (aínda pendiente por resolver os últimos trámites de distribución internacional), que levará por título Organistrum.
Curtametraxes
E en formato máis breve, a directora viguesa Sonica Méndez estreará o vindeiro mes de febreiro a súa terceira curtametraxe. Leva por título As damas negras, un trhiller psicolóxico que acontece durante a representación dunha obra de teatro. Olalla Tesouro, Pepa Yáñez, Antela Cid, Xosé Barato, entre outros, fan parte deste traballo que contou cunha subvención de Agadic e do concello de Negreira. En fase de rodaxe está aínda Aliendum unha historia sobre o amor que comezará a rodar a Escola de Iaxe e Son de Lugo nas vindeiras semanas en Castroverde (A Fonsagrada).