A Fundación Carlos Velo outorgoulle a Méndez Ferrín o seu premio anual

A sede da Fundación Carlos Velo, en Cartelle, acollía este 25 de outubro o acto polo que a entidade recoñecía a Xosé Luís Méndez Ferrín como Veliano de Honra. O escritor ourensán foi escolleito para o galardón anual da entidade en recoñecemento ao seu labor para preservar a memoria de Velo e recibiu unha escultura de Acisclo Manzano e un diploma acreditativo.

O acto, ao que Méndez Ferrín non puido asistir por problemas de saúde, contou cunha laudatio de Antonio Piñeiro Feijoo, que fixo un repaso da relación entre o escritor e o cineasta, ademais de intervencións de Carmen Leyte, presidenta da fundación, e de Jaime Sousa, alcalde de Cartelle. No final da homenaxe proxectouse a peza Nuestra señora, producida por Carlos Velo en 1954. O apartado musical correu a cargo das Pandeireteiras do Forrollo.