Nadal escríbese con minúsculo

Títeres, teatro, cantos de Reis, ludotecas… a parte principal das programacións de Nadal das principais cidades de Galicia está destinada aos máis pequenos. De Pontevedra a Lugo pasando por Santiago, os espazos presentan programación de títeres, monicreques e contacontos que aínda que son para os máis pequenos non teñen temáticas navideñas. Repasamos as actividades previstas para estes días.

Desde que rematan as clases ata o día que chegan os Reis (as tradicionais cabalgatas de Reis son programación indispensable de todos os concellos), as actividades previstas por parte dos departamentos municipais vólcase en ofrecer contidos para os máis pequenos. O formato máis común é o de “festival”, para agrupar funcións diarias sen ningún outro fío temático que espectáculos para pícaros. Faise na Coruña co Festival de Teatro do Andamio (este ano celebra a cuarta edición) e o festival de títeres María José Jove. En Santiago, a Axencia Galega das Industrias Culturais programa a xa tradicional Mostra de Teatro Infantil de Nadal no Salón Teatro (este ano Limiar Teatro coa coprodución Os 4 da Xunqueira; Berrobambán, con Bicharada; Tanxarina Títeres, con Trogloditas; Títeres Trompicallo, con O día que chegou un nube e choveu; e Panamesiana Teatro, con Oh, que bonito é Panamá!). En Ourense, Sarabela teatro, no marco da súa actividade como compañía residente, organiza unha nova edición da MOTI (mostra de teatro infantil). Ata o día 30 de decembro espectáculos de teatro de variñas, de actor, de marionetas que contan historias variopintas que desfilarán polas rúas, garderías e polo auditorio da cidade das Burgas. Alén disto, hai outras actividades que seguen a tónica habitual doutros meses do ano.

Os habituais e os excepcionais
A programación dos concellos nestes días teñen previsto actividades en consonancia co resto de eventos do ano. Desde función teatrais ao abeiro dos ciclos que manteñen con outras entidades (como Novacaixagalicia ou Agadic dentro dos seus diferentes circuítos de exhibición), xunto coas propias que programan os propios concellos. No caso de Santiago, destaca a exposición sobre o fotógrafo cubano, Korda que abriu as súas portas no Auditorio de Galicia o pasado 22 de decembro. Nese sentido, vese unha certa consonancia tanto no número como na liña de actividades coa excepción das cabalgatas de Reis, organizadas polos concellos cada 5 de xaneiro. Canda isto, nestes últimos días do ano destacan as actividades de entidades máis pequenas como agrupacións, asociacións e outros axentes culturais de pequeno tamaño, principalmente pertencentes ao ámbito musical, que ofrecen a súa función anual destas datas. Un exemplo pode ser o que acontece na Coruña onde a Asociación de Amigos do Acordeón celebra a súa Xuntanza de Acordeóns, o concerto de Nadal da Agrupación Albéniz (o vindeiro 28 no Teatro Rosalía de Castro), ou os Cantos de Nadal a cargo de diferentes asociacións de música da cidade. Despois das actividades previstas para nenos, a música é o xénero do que máis funcións se programan nestes días.

Outras actividades
Máis próximos ao ámbito do lecer que ao cultural propiamente dito, os concellos tamén promoven estes días outras actividades como a instalación de pistas de xeo en diferentes escenarios. Vigo é o exemplo máis claro deste tipo de encontros coa celebración de Vigolancia. Trátase dun salón dedicado ao lecer que se celebra no IFEVI (ata o día 30 de decembro) e que acolle unha gran variedade de actividades, desde inchables e obradoiros, ata zonas deportivas, parques de educación viaria ou teatro. Videoconsolas, mascotas Rik e Rok, Karts, Fútbol, baloncesto, jumping, twister, área de ordenadores, ponte con tirolina, educación para a reciclaxe e un punto de recollida de xoguetes. Nesta mesma liña, pero nun ámbito moito máis modesto, o concello de Pontevedra, desenvolve unha ludoteca na que os rapaces dispoñen de actividades e xogos, deportivas, grandes xogos, obradoiros e animación. Ademais, o concello de Pontevedra tamén desenvolve actividades (principalmente contacontos) nas parroquias para que as acción cheguen a todas as partes.