A mostra <i>Os adeuses</i> amosa a emigración a través das fotografías de Alberto Martí

Entre 1957 e 1963, o fotoxornalista Alberto Martí tivo como escenarios destacados de traballo a Estación Marítima da Coruña e mais o Porto de Vigo. Desde alí, retratou sistematicamente as caras da xente que marchaba e que retornaba da emigración. Agora, a exposición Os adeuses recupera unha selección daquelas fotografías da man do Consello da Cultura, o Centro Galego de Artes da Imaxe e mais a Fundación Barrié, achegando unha visión inédita daquela epopeia migratoria.

As setenta e tres imaxes que compoñen a exposición poden verse desde a pasada semana na sede da Fundación Barrié da Coruña. A mostra está dividida en tres seccións, A partida, centrada nos retratos dos emigrantes a piques de marchar, A chegada, na que se amosan os encontros dos retornados, e mais a peripecia do coñecido trasatlántico Santa María, onde se pode seguir o ollar dos secuestrados e mais dos seus familiares cando se atopan no Porto de Vigo. A maior parte destas imaxes permaneceran ata o momento inéditas, e supoñen unha primeira achega ao arquivo fotográfico de Martí, que segundo o propio fotógrafo recoñeceu, está composto por millóns de negativos, froito de anos e anos de carreira.

José Caruncho, coordinador da mostra, destaca algunhas das imaxes que se poden ver na Fundación Barrié, como poden ser a da rapaza que está coidando dos seus irmáns mentres os pais se ocupan da facturación da equipaxe; a da rapaza sentada enriba das maletas; a dos nenos, posiblemente irmáns, que perderon o barco; a da monxa saudando desde o camarote do barco; a fotografía utilizada para a cuberta deste catálogo, onde un grupo de persoas saúda cos panos da man, malia que non se lles ven as caras e debamos intuír as súas expresións. Para el, o traballo de Martí destaca pola súa inocencia no sentido de estar afastando da tendencias fotográficas da época, e compárao coas imaxes de grandes documentalistas como foron Walker Evans ou Dorothea Lange.

Deste xeito, ás coñecidas imaxes de Manuel Ferrol encol do noso fenómeno migratorio, súmase agora unha outra ollada sobre estes adeuses. A exposición poderá verse na Fundación Barrié ata o vindeiro 5 de setembro. Está previsto que a partir de entón inicie unha itinerancia que leve estas imaxes por todo o país. Como apoio da mostra, publicouse un catálogo que, ademais das correspondentes imaxes, recolle varios artigos nos que se analiza a emigración galega e mais a importancia do traballo documental de Martí.