Retrato dun país

Galicia, anos 20. Unha americana desembarca en Vigo cunha maleta chea de obxectivos, rolos de películas, cámaras de foto e unha misión: fotografar a Galicia da ditadura de Primo de Rivera. O resultado pode verse, oitenta anos despois, nunha exposición fotográfica da man da Fundación Caixa Galicia. Un proxecto que comezou en Lugo hai uns meses cunha pequena exposición que se amplía agora cunha mostra que se pode ver na sede da entidade na Coruña e que logo percorrerá toda Galicia. Miguel Anxo Seixas, comisario da exposición, comenta neste vídeo unha selección de imaxes.

Ruth Matilda Anderson visitou Galicia en dúas ocasións, unha en 1924 e outra en 1926 co encargo da Hispanic Society of America (a centenaria institución cultural que se encarga de estudar a arte a cultura de España, Portugal e Sudamérica) de documentar os estilos de vida da Galicia do momento. Algo que fixo cunhas 5.000 fotografías pero que moitas delas non chegaron a ser positivadas ata agora. En maio, a Fundación Caixa Galicia abriu boca cunha exposición con imaxes da fotógrafa e documentalista americana. Non foi máis que a antesala do que está agora na sede da Fundación Caixa Galicia en Coruña, na que se achegan documentos inéditos que serven de reflexo do que foi a década dos vinte no noso país (os oficios, as feiras, o papel da muller, as tradicións etnográficas...).