O CDG estrea o espectáculo circense-teatral 'A serie clopen'

'A serie clopen' é o nome do espectáculo co que este xoves o Centro Dramático Galego inaugura a súa nova temporada escénica no Salón Teatro de Santiago de Compostela. Esta produción propia do CDG ofrece un formato híbrido multidisciplinar que co circo como eixo central inclúe unha dramaturxia na que reflexiona en ton de humor, sobre os retos que ten que afrontar a xuventude nestes tempos de incerteza. Con dirección escénica de Pablo Reboleiro, quen asina tamén a dramaturxia xunto con Clara Gayo, as artes circenses como clown, acrobacias, malabares ou aéreos son protagonistas nesta montaxe, na que a música e o humor teñen igualmente un peso importante.

O elenco está composto por Marián Bañobre, Luz García, Johanna Hess, Raquel Oitavén, Natalia Pajarito, Inés Santos e Guillermo Solo, que poñen en escena unha historia arredor do circo, a historia e as matemáticas. Estas últimas son unha das paixóns de Alicia, unha adolescente que, a través delas, busca darlles resposta aos paradoxos da sociedade actual desde a canle que abre nunha rede social co seu cuarto, aínda cheo de bonecas e xoguetes, como escenario. No equipo artístico atópanse tamén Laura Iturralde na iluminación e videoescena, así como no deseño da escenografía xunto con José Faro; Erea Pérez e Paula Quintas na maquillaxe e caracterización, Marta Alonso Tejada no movemento escénico e coreografía, José Expósito na asistencia de circo, Marcos PTT no espazo sonoro e asistencia de dirección, Xosé Lois Romero na composición musical e Santi Romay na asistencia de produción.

Autobús desde 45 concellos e xira
'A serie clopen' permanecerá en cartel en Santiago de Compostela ata o 26 de outubro, con cinco funcións semanais, de mércores a domingos, ás 18,00 h. Como nas súas anteriores producións, a compañía institucional pon a disposición dos concellos galegos a campaña de mobilidade 'Sobes ao autobús do teatro?' para facilitarlles o desprazamento a Santiago de Compostela para asistir as representacións. Neste caso, o Salón Teatro recibirá público chegado desde preto de 45 municipios das catro provincias. Tras esta temporada de exhibición na sede do Centro Dramático Galego, o espectáculo poderá verse tamén noutros cinco espazos de Galicia e Portugal: Teatro Académico Gil Vicente de Coímbra o 30 de outubro, Auditorio Municipal Carmen Estévez Eguiagaray o 2 de novembro, o Teatro García de Resende de Évora o 4 de novembro, o Auditorio Municipal de Rianxo o 6 de novembro, e Auditorio Municipal de Quiroga o 9 de novembro.