Consellos que dan subvencións

Que o auditorio do Centro Galego de Arte Contemporánea (CGAC) estivera abarrotado a semana pasada para unha xornada meramente informativa, era un indicador de que o que alí se falaba era un tema de moito interese. Programadores, xestores, asociacións, autónomos… todos os que teñen algo que ver co mundo da xestión da cultura no noso país acudiron a escoitar a teoría (a convocatoria) e a práctica (proxectos que xa recibiron subvencións) da liña de axudas do Programa Cultura da Comisión Europa. Aquí van uns apuntamentos do que alí se falou e que nos afecta a todos: público e xestores.

Para o público, que a Comisión Europea conceda axudas a un proxecto galego, implica que teremos contacto con outras realidades culturais, coñezamos outra forma de traballar que se amosan tanto en actividades de lecer como de formación. Foi grazas a iniciativas deste tipo como se puideron (e poderán) ver desde propostas de “novo circo” en Galicia ata desenvolver proxecto de patrimonio pesqueiro, pasando por espectáculos innovadores de danza. Pero conseguir unha destas liñas de axuda non é un traballo doado. Son meses e meses de burocracia e xestións a múltiples bandas e non sempre con final feliz. Augusto Paramio, responsable do Punto de Contacto Cultural en España explica que duns cen proxectos que se poden presentar ás axudas plurianuais (esas que implican a un mínimo de seis países, duran entre tres e cinco anos e teñen un orzamento de mínimo 500.000 anos), só dez son seleccionados. Un camiño que non é nada doado e moitas veces chega a ser desmoralizador.

Os consellos
Augusto Paramio foi moi claro ao establecer as pautas que deben seguir todos os interesados a conseguir unha das liñas de axuda do Programa Cultura. “En primeiro lugar, todos parten do mesmo nivel” afirmou con claridade. As solicitudes que o Punto de Contacto Cultural lles remite á Axencia, entidade encargada de seleccionar os proxectos, son validadas exclusivamente pola documentación que presenta, e non “en virtude de se xa obtivo unha axuda en ocasións anteriores”. O segundo consello que apuntou é o de identificar ben o obxecto de estudo do proxecto e saber cal é a entidade á que lle compete. “Un proxecto que só ten dimensión local debe pedir axuda á instancia administrativa que lle compete, que é o concello e nunca a Unión Europea”. E aquí é onde reside, na súa opinión, unha das claves para ser beneficiario deste tipo de axudas. Ademais, iso leva implícito presentarse á subvención axeitada. É dicir, o Programa Cultura 2007-2013 conta con numerosas liñas de acción que os interesados deben coñecer e axustar ao seu programa. Paramio explica que “a tradución do galego ao castelán non entra dentro das liñas de axuda do Programa Europea non é susceptible de ser beneficiaria, pero se fose a outros idiomas si que sería unha axuda da Comisión Europea”.

O terceiro aspecto a ter en conta, é que “ten que ser un proxecto participado con outros operadores culturais de Europa, é dicir, ten parceiros noutros países”.
Por se non se teñen contactos en Europa, o Punto de Contacto Cultural conta cunha base de datos que está a dispor dos operadores culturais de xente que pode estar interesada en establecer este tipo de iniciativas. Unha forma de buscar socios para desenvolver proxectos, con pouco esforzo e que permite darlle a “vocación europea” que deben ter estas iniciativas.

Por outra banda, Augusto Paramio tamén explica que as persoas físicas non poden acceder a esta liña de axudas. “Teñen que ter personalidade xurídica cos seus estatutos e un mínimo de dous anos de constitución para poder presentarse pero, se non o teñen, deberían buscar unha fórmula como, por exemplo, implicar no proxecto ao concello ou a outra entidade que se poida presentar” explica o responsable do Punto de Contacto Cultural en España. Outro requisito imprescindible para poder acceder a este tipo de axudas, é ter dispoñibilidade financeira. “A Comisión Europea só financia ata o 50% do proxecto, pero os solicitantes deben ter aseguradas as outras partidas económicas”

Estrutura administrativa
O Punto de Encontro Cultural é a entidade que o Ministerio de Cultura ten en España para informar e asesorar daqueles proxectos europeos, que desenvolve a Comisión. Canda esta entidade, existe unha Axencia que ten carácter executivo e é a encarga de avaliar os proxectos que serán os beneficiados das axudas que concede anualmente a Comisión Europea. Entre as novidades da convocatoria desta edición, destacaba o establecemento dun calendario fixo de actuacións: ata o 1 de outubro presentar as solicitudes que se seleccionan entre novembro e febreiro, para o 31 de marzo ter unha decisión final. Como explicou Augusto Paramio, “agora é o momento para que os operadores culturais desenvolvan os seus proxectos para presentar a partir do vindeiro 1 de maio”.