As vendas de libros medraron un 15,9 por cento en 2007

O libro en galego diminúe a súa importancia no conxunto do mercado do libro en Galicia. Esta é unha das conclusións que se pode tirar do Informe sobre o Comercio Interior do Libro que presentaba esta mañá a Asociación Galega de Editores na Sede do Consello da Cultura. Segundo revela o estudo, o libro en galego facturou en 2007 21,8 millóns de euros, un 70% do total no país. A falar do conxunto de libros editados en Galicia, vendéronse un 15,9% máis exemplares do que en 2007. Segundo Víctor Freixanes director da Editorial Galaxia, "este é o maior incremento dun sector editorial no Estado" durante ese ano.

De xeito relativo, a presenza do libro galego no conxunto da edición diminuíu desde o 92,5% de 2003 a un 79,8% da produción de 2007. Esta situación está relacionada, segundo apuntou Freixanes, co incremento destacado das exportacións da editoras galegas e o medre xeralizado no número de títulos.

Entre outras cuestións, os datos revelan a grande importancia que ten o libro de texto para as editoriais, xa que supón o 33,3% da produción e o 49,6% da facturación, aos que se pode sumar boa parte das obras de Literatura Infantil e Xuvenil editadas no país que tamén se dirixen ao consumo escolar. Sumados, este ámbitos e mais a Literatura supoñen o 78,5% do total publicado. Tamén se verifica a importancia das librarías para a difusión das obras editadas no noso país, xa que ata un 55,7% se distribúe en establecementos deste tipo, contando cadeas.