Sede principal do Museo de Pontevedra
Unha nave industrial robotizada no polígono industrial de Barro-Meis acollerá o almacén de fondos do Museo de Pontevedra. A Deputación Provincial anunciaba este 15 de setembro que xa reservou unha parcela de 2.300 metros cadrados para este proxecto, que pretende acabar coa severa limitación de espazo que sofre o centro desde hai anos.
A proposta prevé a construción, aínda pendente de licitar, dunha nave que deberá cumprir estritas condicións de temperatura e humidades para conservar axeitadamente as pezas artísticas e arqueolóxica que o Museo non ten en exposición. A instalación contará con brazos mecánicos para acceder a un sistema de almacenamento vertical.
Na actualidade o Museo carece de espazo para os seus fondos, de xeito que mesmo tivo que adiar a aceptación de doazóns como a colección de Leopoldo Nóvoa por este motivo, segundo apunta o Diario de Pontevedra.
Aínda que o anterior goberno da Deputación prevía empregar o Convento de Santa Clara para este uso, coa remuda na entidade provincial, en 2023 desbotouse esta opción. A intención é que o novo centro estea dispoñible en 2027, ano do centenario da creación do Museo.
