Xéstase unha asociación de concellos con enclaves históricos

Torres, castelos ou fortificacións están espallados por boa parte da xeografía galega. O pasado venres, representantes de catorce concellos que contan con este tipo de elementos patrimoniais reuníronse en Redondela para desenvolver conxuntamente a súa promoción e protección. A proposta, unha asociación supramunicipal, está aínda pendente de elaborar os seus estatutos e concretar a fórmula de colaboración dos municipios. Os promotores agardan que, alén dos que participaron no encontro inicial, outros gobernos locais se sumen e, a medio prazo, agardan fusionar esta iniciativa con outra semellante que xa existe no norte de Portugal.