Quince concellos botan a andar a Asociación de Entidades Locais pola Lingua

A colaboración entre diferentes concellos en programas de dinamización lingüística como Apego ou Youtubeir@s acaba de dar un novo paso. Compostela acollía o pasado venres a asemblea de constitución da Asociación de Entidades Locais pola Lingua, unha plataforma que conta con quince municipios que pretenden desenvolver proxectos conxuntos no ámbito da normalización do idioma e "promover a colaboración entre as distintas institucións para lograr unha xestión máis eficaz dos proxectos colaborativos en materia de lingua" segundo explica o web do Concello de Santiago na presentación da entidade.

Canda a Santiago de Compostela compoñen a nova entidade os concellos da Baña, Ames, A Coruña, Teo, Ribadeo, Ferrol, Narón, Ponteceso, O Grove, Rianxo, Pontevedra, Moaña, Vilagarcía, e Rois. A asemblea serviu tamén para establecer a primeira directiva da asociación. A presidencia recaerá en Rianxo, a vicepresidencia no Concello do Grove, Pontevedra ocupará a secretaría e Ames a tesourería. Ademais, Narón, Rois e Santiago terán cadansúa vogalía.

Non é esta a única organización de entidades locais arredor da lingua. Desde a Secretaría Xeral de Política Lingüística promóvese de xeito paralelo a Rede de Dinamización Lingüística desde 2010. Os 193 concellos que fan parte deste organismo participan de programas como FalaRedes, que achega diferentes actuacións escénicas e musicais na nosa lingua, ou Toponimízate.