David Rubín, Emma Ríos e Miguel Robledo adaptarán á BD clásicos da literatura

Xa sabiamos da adaptación de Romeo y Julieta, a cargo de David Rubín, e do Tirante el Blanco que versionou Miguel Porto e que están próximos a saír. Agora, a editorial SM anuncia novos títulos da colección que adapta para a banda deseñada clásicos da literatura universal. Entre eles, destaca de novo a presenza galega. Deste xeito, Rubín recunca e encargarase de versionar El monte de las ánimas de Bécquer. A el súmase Emma Ríos, que con guión de Ricardo Gómez abordará Amadís de Gaula. Pola súa banda, o ourensán Miguel Robledo encargarase de Edipo Rey, de Sófocles. Deste xeito, en cinco dos dez títulos que inician a colección atopamos autores galegos.