É o showcooking, a cociña espectáculo. Unha tendencia global que fai acto de presenza en Galicia, con produtos e profesionais do país, destinada a explorar o lúdico da cociña e as novas sensacións culinarias. Miles de persoas ateigaron os corredores do Fórum Gastronómico de Santiago de Compostela, superando con moito as expectativas da organización. Longas colas para asistir ao cociñado dunha lamprea, para elaborar a bica ou para maridar viños e queixos do país. É un novo movemento e estivemos alí para contalo nesta fotogalería.
Entre o sábado 16 e o mércores 20 de febreiro hai un punto quente na gastronomía do país: o Pazo de Congresos e Exposicións de Santiago de Compostela. Alí celébrase Fórum Gastronómico Santiago’08 As cociñas do Atlántico, un proxecto do Concello de Santiago con financiamento de varias consellerías da Xunta e outros patrocinios privados e públicos. O Fórum ten dúas grandes partes: a fin de semana destínase ao público aberto, e de luns a mércores, é o momento dos profesionais da hostelería (habitualmente menos cargados de traballo neses días). O programa do público é un intenso caixón de actividades en paralelo, que van desde espectáculos, actividades didácticas, catas comentadas ou demostracións maxistrais ou temáticas.
Entre hoxe é o mércores, pola contra, celebrarase o Congreso profesional. Sen a masificación da fin de semana, o Congreso estrutúrase en ponencias impartidas por 80 cociñeiros que exploran o tratamento de produtos e as últimas tendencias creativas. O programa concilia a presenza de clásicos mediáticos, como Carme Ruscalleda, orientais como Seiji Yamamoto ou diferentes cociñeiros da costa atlántica europa, coma o bretón Patrick Jeffroy ou o dinamarqués Rene Redzepi. Xunto a eles, un numeroso grupo de cociñeiros galegos participarán
O Fórum é un espectáculo de mercadotecnia, un atractor turístico e un creador de marca para Santiago de Compostela e a gastronomía galega en xeral. Aínda que non rematou ata o mércores, a primeira proba, a do público da fin de semana, está superada.
