En Pé de Pedra levou por décimo segundo ano consecutivo a danza ás rúas de Compostela. Doce anos non son nada

Dicir que En Pé de Pedra é un festival de danza ao aire libre que transcorreu a fin de semana de San Xoán en Compostela é sinxelo. O complicado é explicar polo miúdo as experiencias artísticas que se desenvolven no evento. Para que te poidas facer unha idea aproximada, achegámoste unha galería fotográfica que recolle os mellores momentos do festival.

Foron nada menos de vinte e catro actuacións (das que sete eran estreas), entre os días 22 e 24. Toda unha maratón de danza chegada de recantos coma Xapón, Austria, Francia, Portugal, Cataluña, Madrid, Canarias e, como non, Galicia. Por décimo segundo ano, o festival En Pé de Pedra conseguiu sorprender e agradar os paseantes cos seus números, que tiveron como escenario os espazos públicos da cidade de Santiago.

O festival En Pé de Pedra demostrou esta fin de semana que segue vizoso coma o primeiro día ao tempo que está a alcanzar a súa madurez. A sona do evento, que achega cada ano a Compostela figuras de primeira liña da danza contemporánea internacional garante cheos en todas e cada unha das actuacións. Ao tempo, vanse ampliando as posibilidades artísticas ante un público que, logo de acudir todos estes anos a ver danza en prazas e rúas, vaise cultivando e está máis receptivo ás propostas máis vangardistas.

Entre as novidades deste ano, podemos mencionar o ciclo "Puro e duro", unha iniciativa que achegaba cinco solos consecutivos de danza, a cargo de tantos outros artistas, ao marco da Praza de Praterías na noite de San Xoán. Para alén das actuacións en si, o festival achega un obradoiro a cargo de Akemi Takeya entre os días 26 e 29. Precisamente a formación na danza foi o tema que abordou a Mesa Itinerante de Traballo, que coordinaba o Centro Coreográfico Galego. Quédanos agora ver o camiño que vai tomar o evento, que a ameaza con conseguir converterse nun auténtico referente internacional.