O Centro Galego de Arte Contemporánea (CGAC) pecha a súa programación do ano 2000 coa exposición multimedia "Mondophrenetic" que se inaugurou onte. Os artistas belgas Hermann Asselberghs, Els Opsomer e Rony Vissers crearon este proxecto que pretende amosar o desconcerto do cotián.
O bloque de pisos universal
Os bloques de pisos constitúense no centro da mostra, coma paradigma da globalización. Máis de trescentas fotografías destas edificacións tomadas por todo o mundo mostran as semellanzas e a unifomización dos elementos máis cotiáns. Unha montaxe interactiva realizada con ordenador vai amosando as fotos nunha secuencia con sons que o espectador pode modificar mediante o teclado, dando lugar a novas combinacións impredecibles.
Inspiración
Segundo os seus creadores, a experiencia baséase na película de Jean Luc Goddard "Dúas ou tres cousas que sei sobre ela", rodada en 1987 e ambientada nun barrio periférico de París. Desde esa ambientación, e mediante as fotografías crearon unha estructura con presentación, nó e desenlace, pero cunha orde variable.
Programación 2001
A programación do próximo ano arrincará en xaneiro cunha retrospectiva do artista alemán Stephan Balkenhol, á que seguirá "Garaxe" mostra sobre a cultura do automóbil na pintura que actualmente se expón en Madrid. Mostras de Vari Caramés, Pamén e Pereira e Manine Hugonier encherán o centro durante o inverno e a primavera próximos.
