Tras unha reunión da Mesa do Libro e a Lectura á que asistiu a Conselleira de Cultura, Ánxela Bugallo acordouse establecer un pacto por este sector estratéxico que implique aos departamentos de Cultura, Educación e Industria, así como a administracións locais e sindicatos na defensa do libro e da lectura. A reunión de hoxe foi a primeira convocada polo novo goberno deste organismo que senta xuntos a representantes de todo o sector. O director xeral de Creación e Difusión Cultural, Luís Bará indicou que a consellería “se vai mobilizar” porque se trata dun “sector estratéxico, unha cuestión de estado, que toca a cultura, o coñecemento, o acceso á información e tamén ten que ver co futuro da lingua galega e da nosa cultura”. Vanse impulsar tamén os traballos pendentes da Mesa: a Lei do Libro, o Plano de Lectura e a Lei de Bibliotecas.
