Touriño anuncia accións urxentes sobre a lingua mentres a Mesa reclama a dobraxe de filmes e RNE nega a emisión en galego

A Xunta presentará para o vindeiro ano unha proposta de traballo sobre lingua acompañada dun informe orzamentario, segundo anunciaba onte no Parlamento o presidente do Goberno Emilio Pérez Touriño. Touriño sinalou que as actuacións queren afectar a todos os ámbitos sociais e sinalou a súa intención de conseguir “un pacto pola fala”. Simultaneamente, a Mesa pola Normalización acaba de solicitar que se dobren ao galego como mínimo dez dos filmes cunha maior expectativa comercial. Esta medida afectaría títulos coma “O Código Da Vinci” ou “Ice Age 2”, que se estrearán ao longo desta temporada. Pola súa banda, a directora de RTVE, Carmen Caffarel, rexeitaba onte que a cadea Radio 4, de Radio Nacional de España, realice unha emisión integramente en galego. Caffarel contradí deste xeito unha das medidas incluídas no Plan Xeral de Normalización, alegando que o custo da mesma é actualmente inasumible. Radio 4 posúe na actualidade unha programación íntegra en catalán.

Máis información en Galicia Hoxe sobre a proposta de Touriño, sobre a solicitude da Mesa; en Diario de Ferrol sobre Radio 4; web da Mesa