Catro son os finalistas seleccionados polo xurado para competir polo I Premio Biblos-Pazos de Galicia para menores de 25 anos cuxo gañador se dará a coñecer en xullo. O xurado seleccionou de entre os traballos presentados as memorias elaboradas por Eva Moreda Rodríguez, de Ribadeo; Alberto M. Ramos Ríos, de Santiago; Iria López Teijeiro, de Fene, e Alejandra Pérez Feal, de Ferrol. Cada un dos finalistas deberá presentar unha redacción o máis avanzada posible das súas respectivas novelas antes do 15 de xuño para optar ao premio. O gañador poderá pasar todo o mes de outubro na Casa Grande do Bachao a gastos pagados, recibirá un ordenador persoal e unha escultura do artista Luís Loureira; ademais, contará con Méndez Ferrín como titor que lle aconsellará posibles melloras no seu traballo. A obra rematada, que publicará a colección Mandaio e que será editada nunha edición especial en castelán para os clientes de fóra de Pazos de Galicia, deberá ser entregada antes de rematar o presente ano.
Máis información no Biblos Clube
