O certame Biblos-Pazos de Galicia premiará un proxecto de novela aportando as condicións ideais para o seu desenvolvemento

Moitos afeccionados á escritura desexarían ter tempo en condicións para levar ao papel unha idea para unha novela á que levan tempo dando voltas. Agora un certame dará aos escritores e escritoras mozos a oportunidade que desexaban. Nunha iniciativa sen precedentes o Biblos Clube, co apoio de Pazos de Galicia, a Mesa pola Normalización Lingüística e a Asociación de Escritores en Lingua Galega, veñen de convocar o primeiro premio Biblos – Pazos de Galicia. As bases do premio estipulan que se dirixe a mozos e mozas de menos de 25 anos que presenten un proxecto de novela –un capítulo e descrición de argumento, escenarios e personaxes- e o galardón para o mellor é unha estancia dun mes enteiro na Casa Grande do Bachao, próxima a Santiago para o desenvolvemento da novela coa axuda dun autor veterano. A novela gañadora publicarase na Colección Mandaio de Biblos e terá unha edición especial coa súa tradución ao castelán para os clientes de Pazos de Galicia que veñan de fóra.

Máis información en Biblos Clube