Ourense acolle entre o 23 de abril e o 8 de maio a trixésima primeira edición da Mostra Internacional de Teatro Universitario. Unha vintena de compañías de diferentes países participan da cita, que se desenvolve baixo o lema O espazo que ti habitas. A organización da mostra outorgoulle o seu galardón anual á delegación local da Marcha Mundial das Mulleres en recoñecemento a "a súa implicación, o seu compromiso, o seu activismo, tan necesario en días como os que corren".
A programación comezará coa actuación da Aula de Danzas do Mundo do campus de Ourense. A Aula de Teatro do Campus de Ourense Rosaura, achegará á súa vez o espectáculo Bocados nesa primeira xornada. A estas súmanse no programa aulas de teatro dos campus de Vigo, Pontevedra e Ourense (Universidade de Vigo); dos campus de Lugo e Santiago de Compostela (Universidade de Santiago de Compostela), e das universidades de Pamplona, Burgos e da Beira Interior (Covilhã-Portugal).
No marco do programa celébranse tamén á XV Xornadas de Danza con presenza de grupos das tres universidades públicas galegas e do espazo de creación A Casa Vella de Allariz. Alén dos grupos universitarios, o programa inclúe tamén representacións a cargo de Teatro del Barrio, Marta Doviro, a compañía peruana Teatro Anaqueronte, La Líquida e Paula Carballeira. Un concerto de Iberican Roots e dous obradoiros formativos completan a proposta.
