Este domingo 15 de marzo a Mostra Internacional de Cinema Etnográfico fechaba en Santiago de Compostela a súa vixésima primeira edición coa entrega dos galardóns. No palmarés, a produción portuguesa Percebes, de Laura Gonçalves e Alexandra Ramires fíxose co Premio á Mellor Película da Sección Internacional.
Canda a elas, o galego Berio Molina alzouse co galardón á Mellor Película da Sección Galicia por Furada Negra, mentres o premio á Excelencia Etnográfica foi para Alboroque, de Sabrina Fernández Casas. Segundo apunta o fallo do xurado "as obras recoñecidas nesta edición comparten unha mirada atenta ás transformacións sociais, económicas e culturais dos territorios -desde fenómenos como a turistificación ou a migración ata a relación co patrimonio e coa vida comunitaria- abordadas desde propostas cinematográficas moi diversas". A cineasta e montadora Iria Silvosa, o crítico Denís Area e a antropóloga Bibiana Martínez Álvarez compuxeron o comité encargado de seleccionar as propostas vencedoras nesta edición.
De xeito máis concreto, de Percebes destaca a "capacidade de narrar desde a mirada do particular ata abrir unha reflexión máis ampla sobre a dependencia económica do turismo e a perda de identidade como pobo, así como polo maxistral emprego da animación mesturada coas voces reais da veciñanza do Algarve". Furada Negra, de Berio Molina, á súa vez, foi recoñecida "polo tratamento do material de arquivo e, en especial, polo traballo sonoro que constrúe, co que revisita de maneira poética o carácter histórico e simbólico do patrimonio natural". Finalmente, en Albaroque valorouse "a capacidade para construír o relato e a análise etnográfica mediante recursos fílmicos e narrativos que revelan múltiples capas da realidade, desde as consecuencias das permanencias e das ausencias provocadas pola migración no contexto rural ata o contraste entre o traballo forestal e o industrial, así como a importancia da dimensión comunitaria".
