A Casa Museo de Rosalía de Castro, en Padrón, acolle este 22 de abril a xornada Otero con Rosalía. Celebrado con ocasión do Ano Oteriano, o encontro celebra a relación do galeguista coa poeta. Un coloquio cos investigadores Xosé Manuel Salgado e Patricia Arias Chachero é a principal proposta deste encontro, que bota a andar ás 20 horas.
Para alén de abordar da visión de Otero Pedrayo sobre a autora, o programa inclúe a audición do histórico discurso de Otero do ano 1958 en Padrón, xunto coa proxección de imaxes do Arquivo Camilo Agrasar da inauguración da estatua de Rosalía no Espolón desta localidade en 1957 e a coroación de Ramón Cabanillas en 1958.
Segundo lembra a Fundación Rosalía, que coordina estes actos, "Otero protagonizou estes dous actos de masas cun discurso galeguista converténdoo nun acto antifranquista coa presenza das autoridades do réxime. Alí estaban todas as xeracións literarias da Galiza comtemporánea: desde Cabanillas ata a Xeración Nós con Otero e os mozos (Ferrín, Aquilino Iglesia Alvariño, Celso Emilio Ferreiro e outros)".
