O Círculo de Bellas Artes de Madrid acollía este 16 de abril a presentación da nova xeira do selo Mar Maior. A editorial Galaxia relanza este proxecto, nado orixinalmente en 2014, coa intención de "proxectar novas voces da narrativa galega" presentes no seu catálogo mediante a súa tradución para o castelán.
Para este 2026 está prevista a publicación no selo de Cuentos gringos, de Lara Dopazo Ruibal; Las Jermaine, de María Alonso Seisdedos; Runrún, de Ana Varela; Argonautas en el laberinto (Premio de Novela Camiño de Santiago 2024), de Fernando García Calderón, e as novelas Morgana en Esmelle e Circe o el placer del azul, de Begoña Caamaño, homenaxeada no Día das Letras Galegas 2026. Na súa primeira época, o selo publicara unha trintena de títulos de narrativa galega en español.
