Hórreos en Combarro. Fonte: Turismo de Galicia
Os hórreos de Galicia, Asturias, León, Cantabria e País Vasco contan desde este martes 7 de abril co recoñecemento como Manifestación Representativa do Patrimonio Cultural Inmaterial. O Consello de Ministros aprobaba nesta data a declaración que valora estas construcións como "vehículos de transmisión e expresión simbólica de identidade". O recoñecemento diríxese ao seu papel como "marcadores culturais e expresións de identidade colectiva, vinculados a prácticas sociais, saberes transmitidos, memorias compartidas e representacións".
Esta declaración, que se anunciara erroneamente o pasado 31 de marzo, farase efectiva logo da súa publicación no Boletín Oficial do Estado. O novo recoñecemento para estes elementos pretende "garantir a salvagarda desta dimensión inmaterial, incorporándoa de xeito explícito nos procesos de identificación, documentación, estudio e difusión deste patrimonio, reforzando o seu recoñecemento e asegurando a súa transmisión interxeracional".
Segundo indica o Ministerio de Cultura, "estes valores simbólicos configuran un capital cultural que contribúe á cohesión social e ao fortalecemento das identidades locais e rexionais, manténdose vivo grazas á interacción constante entre as comunidades portadoras e o ben, o que asegura a continuidade e recreación dos seus significados no tempo".
