Representantes do Concello xunto cos de Ibuprofeno Teatro Foto: Concello de Catoira
O Concello de Catoira vén de poñer nas mans da compañía Ibuprofeno Teatro, de Santiago Cortegoso e Marián Bañobre a dirección, guión e produción do ‘VikingDrama’ da Romaría Viquinga, a representación teatral que forma parte da festa que se celebra aos pes das torres do Oeste.
Este espectáculo, que ata o de agora encargábaselle á persoa directora da Escola Municipal de Teatro, pasará agora a estar baixo a dirección da compañía profesional co obxectivo de medrar en calidade. Así o manifestou o concelleiro de Cultura Raúl Gómez, quen subliñou que o alumnado da Escola Municipal de Teatro e a veciñanza seguirán a ser protagonistas do elenco.
Gómez explicou que encomendar a redacción do guión, da dirección escénica como tamén da produción da peza teatral á persoa directora da Escola Municipal de Teatro supoñía unha grande carga de traballo que ocupaba boa parte da súa actividade e dificultaba atender outras programacións e iniciativas teatrais diferentes que cada vez son máis numerosas. Aproveitando que a actual directora da Escola cesará en breve no seu posto, o goberno local tomou a decisión de retirar das bases para cubrir a vacante a encomenda do ‘VikingDrama’, e facer que o teatro da Viquinga dependa dunha compañía profesional. O Concello púxose en contacto con diferentes compañías galegas e finalmente será Ibuprofeno Teatro quen se fará cargo.
