Álvaro Domínguez. Fonte: Fundación Xosé Neira Vilas
A Fundación Neira Vilas daba a coñecer este 26 de marzo o fallo do II Premio Xosé Neira Vilas de Literatura Xuvenil. O xurado seleccionou a novela Ensino para místicas de Álvaro Domínguez Rodríguez-Volta como vencedora do certame, que conta cunha dotación de 6.000 euros en metálico e inclúe a publicación da obra por parte da Editorial Galaxia.
O fallo salienta do traballo gañador "a súa hipnótica recreación dun mundo fantástico arredor dunha escola de maxia na illa de Tambo". Deste xeito, a obra "ideada como unha homenaxe aos grandes relatos deste xénero, a historia amosa as narracións dark academy ao tempo que asenta una lectura en clave feminista e reivindicativa, recreando con habelencia a sociedade galega de comezos do século XX".
O autor, nado en Pontevedra en 1986, xa se fixera en 2022 co Premio Xosé Neira Vilas de Novela Curta coa obra Cristais rotos. Canda ao seu traballo, o xurado seleccionou como finalista a obra presentada baixo o lema Todo o que fixemos aquela noite de Irene Rega Jul, un "thriller poderoso protagonizado por un grupo de mozos e mozas que teñen que dar conta dunha morte sorpresiva".
Armando Requeixo, Rosalía Morlán, Sandra Ferrerio García e Gabriel Romero de Ávila compuxeron o comité de selección deste galardón que convocan a Fundación Xosé Neira Vilas e a Editorial Galaxia, coa colaboración da Consellería de Cultura, Lingua e Xuventude da Xunta de Galicia.
