Parque de carbóns das Pontes. Fonte: Plataforma en Defensa do Patrimonio Industrial das Pontes
O parque de carbóns da antiga central térmica das Pontes de García Rodríguez será demolido. Segundo informa o xornal El Progreso, a Xunta autorizou continuar coas obras de derrubamento da estrutura que albergaba o combustible da factoría. A Plataforma en Defensa do Patrimonio Industrial das Pontes e mais o Concello solicitaran a súa protección como Ben de Interese Cultural a atender ao seu interese arquitectónico e histórico.
Segundo recolle o xornal lugués, a Xunta considera que "que non se dan os requirimentos precisos para a tramitación dun procedemento de incoación para a declaración de ben de interese cultural" sobre este elemento. Deste xeito, autoriza a continuar unhas obras de demolición que xa deitaran seis dos dezaseis arcos que compuñan a estrutura. Ante as solicitudes de protección, o Goberno Autonómico paralizara os traballo ao comezo deste mes de marzo con vistas a realizar un estudo para determinar a existencia de valores culturais significativos no conxunto.
O parque de carbóns, que estaba considerado como a segunda cuberta diáfana máis grande do mundo, con 160 metros de luz e 592 de lonxitude, estendíase sobre unha superficie total de 96.000 metros cadrados e foi construído a comezos da década dos 80.
