Central térmica das Pontes. Fonte: Wikipedia. Autor Pepedocouto. CC BY-SA 3.0
Este xoves 20 de xuño cumpríanse dous anos da resolución que abría o expediente para declarar Ben de Interese Cultural da cheminea da central termoeléctrica das Pontes de García Rodríguez. Ao non se ter completado a Xunta neste prazo a declaración, este elemento de arquitectura industrial non conseguirá a máxima protección establecida a nivel legal.
Segundo recolle hoxe El Progreso, a Xunta asegura que neste período obtivo unicamente un informe positivo dos dous necesarios para a declaración. Estes informes consultivos sobre o axeitado deste recoñecemento fóronlle solicitados ao Instituto Padre Sarmiento, unha das tres universidades galegas e mais á Academia Galega de Belas Artes.
Na apertura do expediente, que foi publicado no DOG do 1 xullo de 2022, sinalábase que a peza "posúe características que permiten xustificar a súa singularidade e monumentalidade, polo seu tamaño que a mantén como a máis alta de España e a segunda de Europa". A isto sumáballe o seu carácter simbólico de "todo un conxunto excepcional na súa capacidade de produción eléctrica como na súa relación coa mina de lignitos e a súa historia de máis de cen anos desde que se comezaron a estudar as posibilidades do seu aproveitamento".
