Unha conferencia sobre "Máscaras vivas, ritos, performances y arte mascarero", a cargo de María Pilar Panero, directora de la Cátedra de Estudios sobre la Tradición de la Universidad de Valladolid, abre este 20 de marzo a novena xeira de ViBoMask, o Festival Internacional Mascarada Ibérica. Viana do Bolo e Vilariño de Conso celebran entre ese día e o 22 as actividades deste encontro, que reúnen medio cento de personaxes enmascarados de diferentes entroidos e celebracións tradicionais da Península Ibérica.
Festividades de Galicia, España e Portugal reúnense nun programa que inclúe na súa primeira xornada outras conferencias sobre o Jarramplas estremeño, a creación da máscara do piliqueiro ou os toros e Guirrios de Valilla de la Reina, en León. Unha foliada fechará as actividades dese día 20 en Viana.
Para sábado, celébrase, tamén nesta localidade, un mercado de artesanía e preséntase a Guía ilustrada do Entroido Galego que publicou Edicións Xerais. Sesión vermú e actuacións musicais completan o acto central, o desfile de máscaras que percorrerá as rúas da vila a partir da 17 horas.Tanto o mercado como a presentación do libro e o desfile repetiranse o domingo 22 en Vilariño de Conso.
Programa completo da IX ViboMask
