O programa comeza en Viana cunha conferencia sobre a celebración da Vijanera cántabra, outra que abordará as conexións entre España e México a través das máscaras, e unha terceira centrada nos entroidos arraianos. Un obradoiro de pintura en camisetas e a apertura da mostra que repasa a primeira década deste encontro protagonizan as actividades do día 16, que finaliza cunha foliada e unha actuación musical.
A localidade continúa a protagonizar o programa do día 17 co habitual mercado de produtos típicos e artesanais e o desfile das máscaras. As actividades contarán con ambientación musical en sesión vermú e nocturna, ademais de foliada.
As actividades trasládanse a Vilariño de Conso na última xornada, onde repetirán mercado e desfile. A estes súmase o IV Festival de Música Tradicional e Popular que nesta xeira se suma ás homenaxes polo Día das Letras Galegas.
