A VIII Mascarada Ibérica reúne medio cento de entroidos

Máscaras da Coruña, Lugo, Ourense, Pontevedra, Asturias, Cantabria, Castela e León, Castela A-Mancha, País Vasco, Bragança e Viseu participarán do VIII Festival Internacional ViBoMask Mascarada Ibérica, que se celebra en Vilariño de Conso e Viana do Bolo entre os días 17 e 19 deste mes de marzo.

O encontro, que se presenta como "a maior concentración de mascaradas de toda a península Ibérica" reivindica o patrimonio dos entroidos tradicionais. Na mesma liña, a organización do evento avoga "por elaborar unha candidatura conxunta das mascaradas da península Ibérica para entrar na lista de Patrimonio Cultural Inmaterial da Humanidade da UNESCO".

A actividade comezará na mañá do día 17, cando fotógrafo Pedro G. Losada e o artesán de máscaras Xosé Manuel Seixas impartirán unha experiencia sobre o seu labor no instituto de Viana. Nese mesmo día a sala de exposicións do Concello abrirá a mostra O Entrudio de Viana do Bolo no tempo. Unha foliada polas rúas e bares da aldea completarán o programa desta xornada inaugural.

O ViBoMarket, mercado de produtos típicos e artesanais, que estará instalado na zona da Praza Maior dará paso na tarde do día 18 ao desfile de todas as máscaras participantes na actividade. Os concertos do programa ViBoMusic, con Nova Era, Guezos e SkaloPndras pola noite completan a proposta para a xornada. Para o día 19 será Vilariño de Conso a que acolla o Vibomarket e o desfile de máscaras.