A VI edición da Mascarada Ibérica que organizan cada ano asociacións dos concellos de Viana do Bolo e de Vilariño de Conso chega con novidades. Para alén de incrementar ata corenta e tres o número de tradicións de Entroido representadas, a iniciativa muda o seu nome e preséntase por vez primeira como Vibomask. O nome responde ao irmanamento do evento co festival Mamumask de Cerdeña. Precisamente a illa Italiana estará presente na actividade a través dos seus mamuthones e issohadores. Canda a eles, Cantabria, Castela e León, Castela- A Mancha, País Vasco, Portugal e por suposto Galicia participan do programa.
Como é habitual, a Mascarada consistirá nun desfile polas rúas de Viana do Bolo (día 11 ás 16:30 horas) e outro por Vilariño (día 12 ás 12:30 horas). Con anterioridade, as vilas están a acoller conferencias, obradoiros e presentacións arredor do Entroido ademais de actuacións de grupos de música tradicional.
