Ángel Calvo Ulloa e Juan Canela. Fonte: Deputación de Pontevedra
A Deputación de Pontevedra daba a coñecer este venres 13 de marzo a resolución do concurso público para comisariar a 33ª Bienal de Pontevedra. O xurado seleccionou o proxecto de Ángel Calvo Ulloa e Juan Canela para o evento entre os catro finalistas do certame. Os dous gañadores contarán cun premio de 10.000 euros como anticipo dos honorarios fixados para esta tarefa, cifrados en 70.000.
Segundo sinala a Deputación, a dos seleccionados constitúe "unha proposta sólida desde o punto de vista conceptual, curatorial e técnico, cun discurso ben articulado que establece unha forte conexión co territorio, a paisaxe e as tradicións culturais". O xurado valorou en particular "a capacidade do proxecto para trasladar un relato histórico e simbólico ao presente mediante unha formulación contemporánea e accesible, así como a súa atención á produción local, a incorporación de artistas emerxentes e o potencial para fortalecer a proxección cultural da Bienal".
Ángeles Tilve, directora do Museo de Pontevedra, presidiu o comité de selección de proxectos, do que fixeron tamén parte Nuria Enguita, directora do Museo de Arte Contemporáneo de Lisboa, e Susana González, directora do Centro de Arte e Colección da Fundación María José Jove, ademais de Carlos Cuadrado, secretario xeral da Deputación de Pontevedra.
Ángel Calvo Ulloa, nado en Lalín, ten traballado como comisario en recoñecidos espazos como a Sala Alcalá 31, La Casa Encendida ou Tabacalera de Madrid, asi como en Caixaforum (Barcelona), MARCO (Vigo), a Fundación Seoane da Coruña, o Artium de Vitoria-Gasteiz ou o CCEMx en Cidade de México. O Sevillano Juan Canela, á súa vez, é curador xefe do Museo de Arte Contemporánea de Panamá e membro do Comité asesor do Instituto Cader de Arte Centroamericana do Reina Sofía e desempeñou o labor de curador no programa Encontros en Artbo Bogotá (2025), canda a proxectos en Oslo, Barcelona ou Madrid entre outros espazos. A 33ª Bienal de Pontevedra celebrarase entre maio e agosto de 2027 cos edificios do Museo de Pontevedra como bases principais e, como novidade, unha sede en Vigo, na Sala de Exposicións da Sede Afundación.
