A Real Academia Galega celebrará en Vigo unha gran homenaxe a María Xosé Queizán polo Día da Poesía. Será o 17 de marzo ás 18.30 h. no Museo de Arte Contemporánea de Vigo, baixo o título "María Xosé Queizán. A escrita sen límites". O acto contará cunha loanza da autora por Margarita Ledo, quen afirma que a obra de Queizán "trae a experiencia das mulleres para o centro da trama". No acto participarán os poetas Rexina Vega, Marga do Val, Manuel Forcadela, Fina Casalderrey, Andrea Nunes, Elvira Ribeiro, Pepe Cáccamo, Ana Romaní, María Reimóndez, Camiño Noia, Míriam Ferradáns e Xavier Baixeiras, nun recital que ten a súa correspondencia no volume María Xosé Queizán. A escrita sen límites, que será agasallado aos asistentes. A edición, ao coidado de Ana Romaní, incorpora eses poemas de diferentes autoras acompañados de pequenos textos que "deixan constancia da admiración e do recoñecemento que suscita unha pioneira".
