A Área de Cultura de Deputación da Coruña presentaba este 4 de marzo o Manual para políticas culturais locais. 6 fases e 25 accións para fortalecer a cultura. Esta publicación, que se enmarca no programa A cultura é un dereito, defínese como "unha guía práctica dirixida a persoal técnico, responsábeis públicos e axentes culturais" e está dispoñible en rede.
De xeito máis concreto, o texto, coordinado por Fran Quiroga e Adela Vázquez, "propón unha metodoloxía estruturada en seis fases e vinte e cinco accións co obxectivo de trasladar aos concellos ferramentas concretas para planificar, avaliar e impulsar proxectos culturais centrados no ben común e na garantía efectiva dos dereitos culturais". O manual achega ferramentas de diagnose para coñecer a situación da cultura en cada concello, propón desenvolver estratexias e achega exemplos de éxito de diferentes medidas.
Residencias artísticas, laboratorios cidadáns, traballo social arredor do patrimonio, apoio a asociacións e comisións de festas ou colaboración con outros concellos son algunhas das propostas que se desenvolven no texto, que tamén dá conta da necesidade de avaliación do traballo e da documentación dos procesos realizados.
