Entre os vindeiros 23 e 27 de febreiro, Ferrol acolle a quinta xeira da Semana do Patrimonio Invisible. O programa que permite visitar espazos históricos habitualmente fechados volta nunha edición que incorpora catro localizacións e fai un total de nove. O prazo para reservar unha das visitas guiadas abre este 20 de febreiro ás 12 horas no web da iniciativa.
As novidades para este 2026 serán a antiga sede do xornal El Correo Gallego, edificio modernista do arquitecto Rodolfo Ucha que o concello adquiriu recentemente, o conxunto formado pola Igrexa de San Francisco e o Parador de Turismo, o colexio Arenales Compañía e mais o pazo municipal.
A estas súmanse espazos xa presentes en anteriores xeiras, como o Arquivo Intermedio Militar do Noroeste, situado nun antigo baluarte da muralla, o Faro do Cabo Prior, o Arsenal Militar e a Estación Naval da Graña e mais a Casa Antón, obra tamén de Rodolfo Ucha.
