O pazo de Gandarón, a igrexa e mosteiro de San Salvador de Lérez e o barrio mariñeiro da Moureira son as novas incorporacións á III Semana do Patrimonio Invisible de Pontevedra. O ciclo que permite visitar espazos monumentais habitualmente fechados á cidadanía abriu este 11 de xullo as reservas para participar das visitas.
Canda aos novos espazos, o programa recunca en dous lugares que obtiveron un grande éxito en anteriores xeiras, a sede do Arquivo Histórico Provincial e mais o depósito de auga de Santo Amaro. O ciclo contará cun total de 21 visitas aos diferentes espazos que se desenvolverán entre os días 14 e 16 de xullo, artelladas en grupos máximos de 15 persoas. As reservas poden facerse a través do web da iniciativa.
