Xa están dispoñibles en diferentes plataformas de pódcast e vídeo en liña os contidos das V Xornadas do Entroido que organiza a iniciativa Orgullo Galego. Como é habitual, as gravacións recollen entrevistas de representantes de diferentes entroidos tradicionais do país canda a análises sobre esta celebración.
En concreto, neste ano a iniciativa dá conta das Mascaradas do Val do Támega e adxacentes da man de Nieves Amado, mentres Xosé Manuel Dopazo fala da súa investigación sobre o recuperado Entroido da Illa de Ons e Laura Prieto amosa a súa curtametraxe audiovisual a repasar o Entroido de Camba, en Laza.
A estes súmanse contidos sobre o Antroido de Cerqueda, en Malpica, o de Ribadetea en Ponteareas e o da Fonsagrada da man de representantes destas festividades. As xornadas féchanse cunha conversa con Roberto de la Torre sobre o papel dos fotógrafos na tradición.
Segundo explica Borxa González, responsable do proxecto, "o Obxectivo destas xornadas é coñecer o significado e o valor cultural e antropolóxico destes entroidos e en xeral do Entroido, un dos maiores fenómenos culturais da nosa cultura".
