As VII Xornadas sobre o Entroido de Galiza analizan esta festa en Pontevedra

Dúas citas sitúan o foco da actualidade na etnografía durante o final desta semana. Os vindeiros días 15 e 16 Pontevedra acolle, un ano máis as VII Xornadas sobre o Entroido de Galiza. A Sociedade Antropolóxica Galega organiza este encontro no que se abordarán festas tradicionais deste tipo como as de Pazos de Borbén, Viana do Bolo, Samede ou a de Podence en Portugal. Como é habitual, o encontro compleméntanse cunha exposición fotográfica sobre os entroidos tradicionais do país.

Pola súa banda, en Ponteareas celébrase este venres 15 o I coloquio internacional O patrimonio etnográfico. A propósito da celebración do Corpus en Ponteareas: valor cultural e recurso territorial. Por vez primeira, o concello en colaboración coas universidades de Vigo e de Compostela, complementa a organización desta festa cun evento deste tipo. Estudosos, alfombristas, técnicos e universitarios de Galicia e Portugal participarán durante o encontro en conferencias e mesas de traballo nas que os relatores falarán "do turismo como elemento dinamizador do patrimonio etnográfico, da arte efémera das alfombras de Corpus, do vínculo entre o medio ambiente e o patrimonio ou dos centros de interpretación entre outros moitos temas".