Pontevedra acolle as VIII Xornadas sobre o Entroido de Galiza

A se aproximar as datas da festa chega a Pontevedra a oitava edición das Xornadas sobre o Entroido de Galiza. A Sociedade Galega de Antropoloxía organiza, coa colaboración do Concello de Pontevedra, este encontro que se desenvolve entre os días 28 e 29 de febreiro no centro Nemonon. O Teatro de Entroido, a celebración en Esgos e en Samede, a danza de Entroido na Ulla e mais a figura da Vella nestes festexos son algúns dos temas que se abordarán ao longo das dúas xornadas. Ademais, Carlos X. Ares presentará o seu libro Festividades de inverno na provincia de Ourense e se poderá ver a xa habitual exposición fotográfica sobre esta tradición.

O Entroido de Samede protagoniza tamén o encontro que celebra o Museo do Pobo Galego arredor das Máscaras Tradicionais Galegas. Na tarde deste 20 de febreiro representantes da asociación que recuperou esta tradición explicarán as peculiaridades do mesmo e poderá verse unha representación en directo dos bonitos ou máscaras desta localidade coruñesa.