Co título Xornada sobre as modificacións da Lei do Patrimonio Cultural de Galicia. Análise das repercusións nos concellos galegos, o Concello de Mondariz Balneario e mais a UNED celebran este 5 de febreiro un encontro sobre esta cuestión. A transferencia de competencias no campo do patrimonio aos concellos ao abeiro da Lei de acompañamento aos orzamentos autonómicos para 2026 está a motivar queixas desde diferentes ámbitos, e agora esta iniciativa quere reunir especialistas en historia, arqueoloxía, arquitectura e representantes do Parlamento de Galicia en diferentes mesas e conferencias con vistas a responder a cuestións pendentes.
Segundo lembra a presentación da iniciativa, o encontro pretende "a través de cualificadas exposicións, coñecer e comprender os motivos desta nova redacción, reflexionar e debater sobre o alcance das mesmas, e de ser o caso, intentar achegar solucións e implementar as medidas que podan garantir, ante a xa vixente modificación, a protección e salvaguarda do rico e extenso Patrimonio Cultural de Galiza". Consello da Cultura Galega, Federación Galega de Municipios e Provincias ou Plataforma Estatal de Profesionales de la Arqueología, foron algunhas das voces que alertaron dos problemas que pode implicar o novo marco legal.
O programa, que se inicia ás 16:45 horas, abrirase cunha intervención de Aurora Corbacho e Rebeca Blanco Rotea para explicar o que supoñen estas recentes modificacións. A esta seguiralle unha mesa redonda arredor desta mesma cuestión que contará coa presenza de Mauro Chivite, Luciano González Alfaya, Alberto González Fernández, Xosé Luís Penas Corral e Jaime Almansa Sánchez. A sesión continuará con outra mesa de debate entre representantes dos grupos presentes no Parlamento de Galicia sobre o tema das xornadas. Aurora Corbacho, José Luis Ferro Iglesias, Mercedes Queixas Zas e Silvia Longueira Castro protagonizarán este encontro, ao que seguirá un coloquio co público asistente para fechar a xornada. A iniciativa pode seguirse tanto de xeito presencial como virtual a través do web da UNED.
