Cando se fai un mes desde o final do 'Ano Castelao' aínda se manteñen accións que levan a traer a súa figura á atención contemporánea e demostran a súa vixencia máis alá dunha efeméride. É o caso do concerto que este vindeiro sábado, 31 de xaneiro, terá lugar no Auditorio Fuxan os Ventos, de Lugo, onde a formación Lucus Ensemble presentará un percorrido musical pola vida do político e artista. Baixo o título de 'Percorrendo Castelao', esta formación de grupo de vento, corda, percusión e voz combina unha selección de temas galegos, bretóns e americanos cunha narración biográfica audiovisual, no que se repasan fitos da traxectoria de Castelao, desde 1909 ata 1984. O espectáculo, presentado co gallo do 'Ano Castelao', seguirá de xira durante este 2026 ao manter a súa vixencia e aceptación máis alá das celebracións oficiais.
