O xacemento romano. Foto: Asociación Terra Grovii
A Dirección Xeral de Patrimonio catalogou dous novos xacementos arqueolóxicos no concello de Salvaterra do Miño. Os achados déronse coa remoción de terras nun terreo vinculado á creación de viñedos, que fixeron aparecer diferentes materiais de época romana, como tégulas ou cerámica. Un veciño da zona, Sergio Domínguez, alertou da aparición destes restos e comunicoullos á asociación Terra Grovii, quen se puxo en contacto con Patrimonio. Tras unha visita á zona, os técnicos inventariaron o novo xacemento e outro máis, o Coto dos Ladróns, onde aparecen materiais paleolíticos, e que xa fora localizado no seu día polo arqueólogo Alberte Reboreda.
