Aínda que se asocia a lingua galega no século XIX coa lírica e o Rexurdimento, houbo un tempo no que o galego foi empregado como instrumento nas loitas políticas da turbulenta primeira metade do século XIX. O Consello da Cultura Galega presentou a semana pasada a versión dixital de "Papés d'emprenta condenada. A escrita galega entre 1797 e 1846" un proxecto que naceu como unha iniciativa editorial que en tres volumes recuperou 105 testemuñas escritas do uso do galego, tanto manuscritas como impresas. coa edición dos profesores Ramón Mariño Paz e Damián Suárez, a nova web facilita un acceso moi rápido e comprensivo aos documentos. Moitos deles corresponden a unha temática dos debates políticos entre liberais e absolutistas en relación aos conflitos da época, entre a invasión napoleónica e os seguintes réximes políticos. Segundo Manuel Gago, coordinador do desenvolvemento do proxecto, "as novas ferramentas permiten un pre-análise dos documentos que permite comprender a súa distribución cronolóxica, o seu ámbito temático e, en suma, explorar de miles de formas posibles este material documental". Para Gago, os Papés d'emprenta condenada son o punto de partida dunha nova xeración de produtos do CCG que "farán unha explotación máis intensiva das capacidades de cálculo e análise sobre os materiais documentais".
