Os Premios do Cinema Europeo teñen unha especial presenza galega na súa 38 edición. O filme Sirât, de Óliver Laxe, acumula catro candidaturas nos galardóns que convoca anualmente a Academia de Cinema Europeo. Ademais, a produción opta tamén a se facer cun dos Premios Forqué, que entrega a asociación de produtoras audiovisuais EGEDA a nivel estatal.
No caso dos Premios do Cinema Europeo, o traballo de Laxe pode facerse cos premios á Mellor Película, Mellor Dirección e Mellor Guión, mentres o seu protagonista, Sergi López aspira ao recoñecemento como mellor actor. Os premios entregaranse o vindeiro 17 de xaneiro nunha cerimonia que se vai desenvolver en Berlín.
Nos Premios Forqué, Sirât opta ao premio á mellor longametraxe do ano. A entrega dos galardóns realizarase este 13 de decembro en Madrid.
