María Dolores Santos Maneiro Foto: AGPXC
A Asociación Galega de Profesionais da Xestión Cultural (AGPXC) ven de crear e outorgar os Premios do Castro á Xestión Cultural Galega. Os galardóns nacen para poñer en valor unha profesión que é, en boa parte, responsable da cultura viva e diversa que nos rodea e recoñecer cada ano a traxectoria de figuras destacadas neste eido dentro do país e levan ese nome como homenaxe ao proxecto cultural e empresarial de Isaac Díaz Pardo e Carmen Arias. Nesta primeira edición os premios recoñecerán a traxectoria da María Dolores Santos Maneiro, a técnica de cultura do Concello de Muros, coñecida no sector como "Madó". Para esta elección a AGPXC valora que Santos Maneiro vén traballando desde 1987 na programación de espectáculos ao vivo e obradoiros culturais no ámbito municipal, destacando no seu labor as Xornadas de Cultura Mariñeira Muros Mira ao Mar, caracterizadas pola implicación e participación das entidades sociais e a veciñanza da vila.
A entrega do galardón desta primeira edición vaise celebrar o vindeiro 16 de outubro no Pazo de Mariñán dentro da xornada 'O papel da xestión cultural no fortalecemento da cultura', na que se van presentar recursos e perspectivas laborais para o autocoidado das persoas que traballan nesta área da cultura e na que tamén se traballará sobre a aplicación dos manuais de boas prácticas presentados pola asociación arredor das artes visuais e os espectáculos ao vivo. Nesta xornada tamén vaise explicar con detalle os obxectivos da Enquisa a Profesionais da Xestión Cultural que a asociación está realizando entre o sector coa colaboración da Deputación da Coruña
