Cartel das Xornadas
A Deputación da Coruña celebra a segunda edición das Xornadas europeas do Patrimonio cun completo programa de visitas guiadas gratuítas e un obradoiro de astrofotografía. As visitas recollen espazos singulares como xoias industriais, xacementos romanos, monumentos naturais e fortalezas medievais. En concreto, o venres 3 de outubro percorrerase o Barbanza industrial, na Central Hidroeléctrica do Tambre (Noia), as Conservas Cerqueira (Ribeira) e o pasado de espionaxe e contrabando (Minas de Wolframio de san Finx (Lousame). O sábado 4 de outubro é a quenda da Costa da Morte, con visitas ao Faro do Cabo Vilán (Camariñas), a Baleeira de Caneliñas (Cee) e o xacemento romano de Brandomil (Zas). O domingo 5 de outubro tocará o "interior medieval e tradicional", co Batán de Mezonzo (Vilasantar), o castelo de Mesía (Mesía) e a igrexa románica de santo Antoniño de Toques. As prazas son limitadas e a inscrición aínda está aberta no web da Deputación da Coruña.
