O Auditorio Manuel María de O Carballiño acolle desde o 13 de setembro e ata o 26 de outubro as exposición que fan parte do programa Arenteiro Fotográfico. O encontro que organiza a asociación O Potiños conta nesta xeira cun total de 17 mostras, ás que se suma unha clase maxistral de Gervasio Sánchez, Premio Nacional de Fotografía. A entidade ademais publicará un volume colectivo a recoller os traballos expostos.
O Grupo Bazán, Aurora Soler, Cristina Abilleira, Ale Megale, Alba Chan, Roberto Steinbrügenn, María Tudela, Carlos Muíños, o IES Chamoso Lamas ou Jota Barros son algúns dos protagonistas das mostras. A clase maxistral, de acceso gratuíto con inscrición previa, desenvolverase o vindeiro 11 de outubro ás 17 horas, na Casa da Cultura.
No marco do evento entregaranse o día 13 de setembro os premios do concurso anual deste encontro. O xurado seleccionou as obras de Luis María Barrio, que levou o primeiro premio, Javier Arcenillas, que se fixo co segundo, e Mario Matías Pereda para o terceiro posto. En total presentáronse á convocatoria case duascentas obras de todo o Estado.
