A novela gráfica A morte nas fragas achega a memoria histórica á BD

Este 24 de xullo a Escola Laica de Cabanas acolle a presentación de A morte nas fragas. Esta novela gráfica, con guión de Anxos García Fonte e debuxo de Carlos Sardiña, afonda nas historias da represión e da resistencia que se viviron na zona das Fragas do Eume, a coincidir coa construción da central hidroeléctrica no río. Un total de 120 páxinas a branco e negro conforman o volume, editado por Radiofusión.

A editorial Galaxia continúa a súa aposta pola saga A brigada iridescente, que vai xa polo seu segundo volume. Elena Andrés sitúa desta volta o grupo protagonista ante o misterio de O fantasma do vestiario das rapazas nunha obra a toda cor de 68 páxinas.

Xerais, pola súa banda, anuncia Lela, a superavoa. Nesta nova obra, Xosé Tomás continúa a súa aposta por historias breves e humorísticas centradas no público infantil. Desta volta, as aventuras dunha anciá con superpoderes protagonizan os enredos do volume, que conta con 56 páxinas a toda cor.