O Ministerio de Cultura financiará a restauración da Casa-Museo de Rosalía

O ministerio de Cultura financiará con 50.000 euros a rehabilitación do Edificio Murguía (antes Centro de Estudos Rosalianos), "o último que queda por restaurar da Casa-Museo Rosalía de Castro", segundo a Fundación Rosalía. O anuncio realizouse durante a visita do ministro de Cultura, Ernest Urtasun, ao centro rosaliano, no que expresou que esta colaboración "queremos que teña continuidade e respaldo por parte do Ministerio". Durante a visita, Anxo Angueira explicou que a Fundación ten como obxectivo "ampliar os servizos da Casa de Rosalía", con novos espazos expositivos, pedagóxicos e administrativos.